Næst síðasta ferðin

Í dag var troðið í sendibílinn og hestakerruna og jeppann öllu því sem komst og það var nú drjúgt svo ekki sé nú meira sagt. Allt of seint lögðum við af stað til að koma bræðrunum til vinnu og halda suður með skrudduna okkar meðferðis. Ferðin gekk vel og þegar komið var á H4 var byrjað á að ryðja leiðina til að koma farangrinum á sinn stað. Eitt og annað þurfti að fara út svo hægt væri að koma nýjum hlutum á sína staði. Það sem olli okkur vanda og áhyggjum var blái svefnsófinn og gamli brúni sófinn sem hefur prýtt stofuna á H4 upp á síðkastið. Úr rættist heldur betur því þegar við feðgarnir vorum í þann mund að troða þessum sófum inn í sendilinn fæddist sú hugmynd að heimsækja Guddu móðursystur og spyrja hvort hún vissi um einhvern sem hugsanlega hefði not fyrir annan hvorn. Gudda var nú ekki lengi að koma sófunum út því Jóhanna dóttir hennar er að flytja suður (á Völlinn eins og allir aðrir í fjölskyldunni) og Inga Sif sem er nýbökuð mamma gátu og vildu fá þá. Mikill léttir þar. Þessi ráðstöfun vakti upp minningu frá því að við IP vorum á hótelinu í Stokkhólmi í síðustu viku að þar var áletrun uppi á töflu "The Secret of Having is Giving".

Við erum semsagt komin með allt það helsta frá RSK. Á morgun er fyrirhugað að brööööna aftur norður til peyjanna og tæma hús og bílskúr auk þess að þrífa það sem eftir er. Svo er bara að finna náttstað og klára dæmið þarna. Strákarnir eru að vinna út næstu viku og þá ætlum við að vera búin að koma okkur fyrir hér syðra og leggjast í ferðalög og slíkt með drengjunum.

Langur dagur er að kveldi kominn og kominn tími til að ganga til náða í svefnherbergi hjónanna að H4 í fyrsta skipti og það meira segja í hjónarúminu. Sumir eru orðnir þreyttir og illa haldnir eftir burð dagsins, fyrst inn í bíla og kerrur og svo út úr þeim aftur. Og allt tókst þetta nú án utan að komandi hjálpar og geri aðrir betur